أنا

by Tasneem Nagi

أنا
أنا صوت
أتسمعني؟

أنا همس
يعانق داخل القلب
أنا
لمحة
تحررنني
إطلاقة طرفك
والردة

أنا صوتك
أنا صوتي

أنا

أنا سودانية
شلوخ حبوبة
ووشم النيل
على جبهة تضوي
بشرق حنين
أنا رملة وادي
نيالا تحضنه بغرب جميل
أنا دقة طبلة
ونقارة
أنا رمحة صيد
وسنارة
أنا موية ووادي
وصحرا كمان
أنا وحدة فرقة
أنا السودان

أنا
السمرة تسكن في جسدي
عرق من أفريقيا يسري
في دمي
في أمسي وغدي
على دق طبول
يرقص قلبي
ما بين الدقة والدقة
تصرخ همسة

بنختلف
يا زول اصلنا بنختلف
ياهو الفرق بقانا ناس
والبينا بس لوح من  قزاز
تعاين تقول
هنداك اخوي
ول ما اخوي؟

دا درجته أغمق حبتين
وسماره ظاهر في العنين
ونخرته ما وقفت عديل
يا زول أقولك مستحيل
مانك اخوي!

دا درجتو أفتح حبتين
لون العسل ساكن العنين
جلابي
شاي الغزالتين
مانك أخوي!

البينا بس
لوحة قزاز
دايرالا بس
يدا تمد بسلام حنين
وبتنكسر
والحاجز الما ليو غرض
وعلينا كلنا انفرض
عايزلو بس
لما الهبيل
ود الاصول
والنبل والنسب العريق
يسترجى ينطق بكلام
ما ليهو معنى ولا كيان

يا عب! يا خادم بليد!
من شكلك اصلو باين الغبا
وينفع معاك شغل الشقا

ود العرب
يا جنجويد،
يا جاهل انت ويا غبي!

عايزلو بس
ضحكة من جوة الصميم
تكسر غروره تدشدشه
ووراهو ناس يتوشوشوا
شوفوا العبيط!
قالوا العلم ما بزيل بلم
وانت ياكا بس شايل الاسم
الناس تحلق تنتشر
أبعد بعيد
من التخلف والجهل
لون الجلد؟
شوف الفهم، شوف العقل
شوف القلب، شوف الصفو
شوف الأخو
شوفوا العبيط
دا حدوده بس،
صندوق قزاز!
صندوق عمى
ولو ما الكلام دا اترمى
ولو ما اندفن
لو ما اندثر
يصبح شبح
يكتم على أم قلبنا

أشباح،
ظلال وظلام
تعمي عين القلب المفجوع
كي يأبى أن يصمت عن جوع
وبحور الدم
تصبح أعمق
إن قتل أبي
ما عدت أخي
لو لم تثأر
مزق قلبه
اصرخ ازأر

وطبول الحرب تدق هناك
شجر أسود
ارض حمراء
ودم أحمر
ما عدت أنا إن لم أثأر
فأخي قتلوه
وأبي قد مات
بيتي قد حرق وصار رماد
بيت؟
لا وطن سوى ظلمة غابات
قلبي ما عاد يضخ دما
بل زفتا
بل طينا أسود

أخبرني ما أملك كي أخسر
وأنا لا أملك قلب بشر
أغرق في ظلمات أعمق
وكراهيتي باتت تحرق
عيناي غدت
عيون ذئاب

أخبرني أي أرض أزرع؟
ويدي لا تمسك غير سلاح
علمني معنى الاستسماح
وأنا
إما أن أَقتل أو أُقتل!