بلا عنوان

by Reem Bahaa

مع انك رزعتا ابواب كتيرة في وشي
لسة الحياة مستمرة و قاعدة تمشي
و انا لساتني في محلي و ما ناوية امشي

بغض النظر عن البيبان الانت قفلتهم
في الف غيرهم
لسه مفتوحين
و حفضل احاول معاك
لمن كلهم يتسدوا
في اللحظة ديك بس امكن اغض النظر

حتى لو فتحت ذراعيك لالف غيري
برضو يوم تجيني
حنسى ليك كل الحصل
و اجيك جارية ليك
مشتاقة ليك
مشتاقة لي قعدتك و ونستك
مشتاقة للجبنة معاك
مشتاقة لي مرقاتنا
مشتاقة لي اغانينا
مشتاقة لي كل تفاصيلك الصغيرة
و مهما قسيت علي برضو بريدك
و ما اقدر اقسة عليك

حتى لو جفيتني سنتين
و الأيام قستك علي
يوم ترجع
بضمك
و اقعد ابكي على كتفك ساعات
و احكيك عن الحصل في غيابك

انا تايهة بين اني اسيب كل شي للقدر
و بين اني احاول اغير في القدر
بس انا حاساك انت قدري
و الإحساس دا من يوم لاقيتك
ما فارقني
حسيتك اجمل و اسعد أقداري

عارفاك طيب
رغم الجفى و عدم الاهتمام
شايفة في عينيك الحنين
الحنين الشوفتو في عينيك
خلاني اتلخبط

و انا كل يوم بتعلق بيك اكتر
و شايفاك في كل تفاصيل حياتي
بنوم بحلم بيك
بصحى بفكر فيك
لمن أغانينا تشتغل بقعد اسرح فيك

كل يوم للتاني بزور الأماكن الكنا بنمشيها سوا
و اقعد اتذكر لحظاتنا
لحظات الزعل
و لحظات الرضى
و لحظات  الهوا
و لحظات كانت اجملا

انا راجياك
راجياك عشان نعيد كل اللحظات
و نعوض بعض عن كل المضى
و نعيد كل لحظة كانت جميلة بينا
و ما تشيل همي
انا مسامحاك
و لسة بحبك زي الاول
و اكتر شوية